دار أجيال

محمد شرف الدين

Tags

افن النكد الزوجي – المقالة الثالثة

May 27th, 2014

النكد صنعة بنعملها كل يوم ..
بنتفنن أننا نستفز بعضنا بحاجات تضايق الطرف الثاني وبعدين ينزعل لما الطرف الثاني ينكد علينا ..
يتيجي الزوجة أو الخطيبة منتظرة أن راجلها (خطيبها أو جوزها) يعمل حاجة معينة .. يشيل منها الشنطة، يزق البوسيت، يحس بها وهي متضايقة، يجيب لها هدية مفاجأة، يشيل شنطة البيبي، يشتري الحاجة الناقصة في البيت، يغير اللمبة المحروقة، يصلح أوكرة الباب المعلقة، يجيب الرجل بتاع السلك علشان السلك الدايب والمقطوع من السنة اللي فاتت، أو يجيب السباك علشان يصلح التواليت اللي بيخر وبيغرق أرضية الحمام كل شوية … إلخ إلخ …
وتفضل مستنية علشان يعمل كده ويحس على دمه وهو ولا هو هنا …
طبعا مش محتاج أشرح اللي بيحصل بعد كده من فتح لأبواب الجحيم في البيت من النكد الذي يتبع أقل مشكلة او نقاش يحتد بينهم، لأي موضوع تافه ثاني .. ده لو استنى الكلام جواها أصلا …
فمثلا : ممكن تبقى عامله كل حاجة في البيت زي الفل وتيجي على حاجته وتسيبها ما تعملهاش ..
أو تهبد حاجة وهي داخلة أو خارجة (باب عربية … باب شقة … إلخ إلخ)
أو تقارنه براجل ثاني (ممكن أبوها أو أخوها او أبوه أو أخوه) مش سايب بيته ناقصه حاجة ..
أو تبص في فيلم أو مسلسل على راجل شايل الكاريكوت من مراته أو شنطة البيبي وتقول له (آدي الرجالة ولا بلاش)
أو تتعمد تحطه قدام الحاجة البايظة علشان يضطر يستعملها وهي بايظة وتقول له: (أنت مش فارق معاااك حاجة خالص؟؟؟)
وعادة ده بيؤدي لـ:
1- الرجل بيحس بإهانة أنه اتقارن وبيحس بجرح في كرامته وأن مراته بصا له أنه قلة ، وأنه مش مالي عينيها ، وده بيبقى جارح لكرامته .. وممكن قوي مايبقاش فاهم السبب أساسا …
2- بيبقى الراجل حاسس أنه مستهدف للنكد في الوقت ده وبيفضل يهرب من المواجهة وبرضه مش بيبقى فاهم أصل الموضوع ايه ؟؟
3- بيبقى الرجل حاسس أن الحاجة اللي اتهبدت ده حاتبوظ وأن مراته عاوزه تبوظ الحاجات الحلوة اللي في حياته فيرد عليها رد مش كويس .. وبرضه مابيبقاش فاهم هي ليييه عملت كده وأصل الموضوع والنكد ده ايه ؟؟ ما احنا كننا كويسين من شويه ؟؟
غالبا مفيش شاب أو رجل في العادي بيحس لوحده باللي مطلوب منه من غير ما يتطلب منه ..
آه صحيح .. وكمان الرجالة بيحبوا حاجتين مع الطلب :
1- أنك تقعدي تفكريه كل شوية …
2- أنك تشكريه بعد ما يعملها شكر خاص جدا …
يعني ببساطة أطلبي إللي أنت عاوزاه من راجلك بصراحة .. وشجعيه لما يعمله … وده حيريحك كثير قوي …
يا بنات ويا سيدات : بلاش تحطي افتراضات أن اللي قدامك حاسس باللي جواك وأنه (طبيعي) يحس باللي جواكي لوحده، وكمان انه يتصرف زي ما انت متوقعة أو راسمة في دماغك بالضبط ..
كلميه باللي في قلبك وفي عقلك بصراحة .. اعرضي عليه الموضوع في صيغة طلب لحاجة مهمة بالنسبة لك (مش بصيغة أنها حاجة هو مقصر فيها وكل الرجالة بيعملوها) .. وفكريه .. واشكريه دايما بعد ما يعملها .. وحسسيه انه مافيش في الدنيا زيه …
آآآه صحيح .. نسيت أقول لك : بلاش توجيهات يعمل الحاجة ازاي الله يكرمك .. وسيبيه هو حيتصرف ..
جربي وادعي لي

Copyright © 2018 The Sacred Bond Rights Reserved | Privacy Policy | Sitemap