دار أجيال

محمد شرف الدين

Tags

افن النكد الزوجي – المقالة الثانية

May 27th, 2014

النكد صنعة بنعملها كل يوم ..
بنتفنن أننا نستفز بعضنا بحاجات تضايق الطرف الثاني وبعدين ينزعل لما الطرف الثاني ينكد علينا ..

ييجي الزوج أو الخطيب يبقى نفسه أن خطيبته أو مراته تعمل حاجة هو بيشوف واحدة غيرها بتعملها كويس ..
يعني يشوف واحدة زميلته في الشغل لابسه حاجة لطيفة ونفسه مراته تلبس زيها يروح يقول لها “شفتي فلانة كانت لابسه طقم … يبقى وااو لو لبستي زيه”
أو يشوف مامته عاملة طبخة حلوة .. “يا ريت تتعلمي الأكلة ده من ماما علشان تعمليها لي علشان أنا باحبها”
أو عنده مرات صاحبه بتعمل نشاط جنب مسئوليات البيت “شفتي مرات عتريس صاحبي نشيطة ازاي وعارفة توازن بين مسئوليات البيت والنشاط اللي بتعمله؟؟”
أو أخته عملت رجيم بعد الولادة ورجعت رشيقة زي قبلها فيقول لها “ايه رأيك تقعدي مع سوسن أختي تتعلمي منها عملت ايه وتعملي زيها علشان ترجعي مزتي زي زمان”
أو يشوف بنت خالته بتشتغل وبتساعد جوزها في مصاريف البيت وشكل ولادها متربيين كويس وبيتها نظيف ومرتب فيقول لها ” يا سلام لو كل الستات زي نفيسه بنت خالتي اللي قايده صوابعها شمع علشان تحافظ على بيتها”

طبعا مش محتاج أشرح اللي بيحصل بعد كده من فتح لأبواب الجحيم في البيت من النكد الذي يتبع ضرب الأمثال ده

مفيش بنت في الدنيا تحب أنها تتقارن بواحدة ثانية ..
أبسط رد : “لو عاجباك يا أخويا رووووح اتجوزها، وحل عن نافوخي”
الحقيقة أن عمل المقارنات ده أو ضرب الأمثلة الايجابية بيتفهم من الطرف الثاني (اللي هي الست أو البنت اللي انت متجوزها) أنه مقارنة لصالح الثانية، وأنك عاجباك الثانية أكثر، وأنها هي نفسها مش ماليه عينك

وعادة ده بيؤدي لـ:
1- افتعال خناقة ونكد حتى يقضي الله أمرا كان مفعولا
2- كرهها لسيرة الثانية اللي انت بتمدحها قدامها ولو شافتها حيبقى نهارها أسود في اليوم ده (حاتستلقى منها كلمتين في الجنب وحركتين من بتوع النسوان اللي احنا يا رجالة ما بنفهمش فيها ولا منها حاجة)
3- لو زوجتك او خطيبتك ضعيفة الشخصية وماعندهاش ثقة في نفسها، ممكن تفقد ثقتها في نفسها وتحس انها مش عاجباك في حاجة ولا راضياك ويخلليها فترة ما لغاية ما انت تحس بها كارهه نفسها ومش حابه تطور من نفسها
4- افقد الأمل لفترة ما من انها تعمل الحاجة اللي انت نفسك تشوفها بتعملها زي اللي انت وصفتها لأنها مش حاتحب تعملهولك أبدا لغاية ما تنسى اللي حصل وييجي من نفسها (سميه عِناد أو سميه غباوه بس ده غالبا اللي حيحصل)

يا شباب : لو عاوز مراتك تعمل حاجة انت نفسك انها تعملها لا تصارحها بكده، ولا تضرب لها الأمثال .. قول لها أنا باحبك زي ما انت كده أنت نور عيني من جوه وأنت الكل في الكل، وحسسها انها أميرتك وأن مافيش ست غيرها في الدنيا ممكن تملى عليك حياتك زيها … وهي حاتديلك أكثر من اللي نفسك فيه بس ما تقارنهاش بحد ثاني لأنك مش الراجل الثاني وماتعرفش اللي انت بتقارنها بيها ظروفها الثانية اللي انت مش شايفها ايه ….

جرب وادعي لي

Copyright © 2017 The Sacred Bond Rights Reserved | Privacy Policy | Sitemap